Naraka
Naraka joda da pok di alam Akhirat tigambarko rik pok say ngarabayko, manom, panas, rasa mak losay, rik ponuh siksaan dilomna, naraka sa joda da balosan untuk jolma say mak haga buiman, habolis, rik jolma-jolma kafir samaso hurik di unggak duniya.
Baruyut Kata
[dandani | dandani sumbor]Istilah "Naraka" dilom basa Malayu rik varianna (tikuruk da basa Kumoring rik Indonesia) buasal jak basa Sanskerta, joda da Naraka (Diwanagori: नरक), joda da alam kapatiyan dilom igamo jak India, tikarung da Hindu, Buddha, rik Jainisme.[1] Nurut say teori, istilah sina buasal jak bakak kata nṛ atawa nar (manusiya) rik aka (duka), jadi sacara harfiyah hortina "kamaklosayan manusiya".[2]
Gambaran Nurut Islam
[dandani | dandani sumbor]Naraka tigambarko sabagay samungkal pok say ponuh lah apuy, panas, manom, kasaroan, rik siksaan torus-torusan makka watasna. Naraka mak sa'uni na panas matak-patak, tapi wat munih waktu ngisonna say tisobut rik golar Zamharir, hawa ngison sija panday ngacayko bawak panghunina.
| QS. Sad 38:57 |
|---|
| Sija da (azab naraka), gana da tiyan ngarasakona, (inuman tiyan) uway say tipaliwat panas rik uway say tipaliwat ngison. (Sad 38:57) |
Tingkatan Naraka
[dandani | dandani sumbor]Naraka pok nyiksa ho risok tisobut Jahanam say uwat 7 rawang. Kapitu rawang sina joda da:
- Hawiyah
Joda da naraka say tikhususko untuk jolma-jolma say hampang timbangan amalna, sa'uni di duniya tiyan ja anggawiko gawi holaw bucampur rik gawi jahat. Jolma Islam say la'un na mak sasuway rik ajaran Islam, cara sungkan Sambahyang, nyopok rajoki makay cara say mak Halal, Riba, rik kaunyin macom-ragomna, Hawiyah pokna. - Jahim
Joda da naraka say tikhususko untuk jolma-jolma say Musyrik atawa nyakutuko Allah, nonti tiyan ja disiksa lah sasombahan tiyan. Dilom Islam Syirik joda da dusa balak, bakdu syirik hortina uwat lagi makhluk say hibat jak Allah. - Saqar
Joda da naraka say tikhususko untuk jolma-jolma say Munafik, say ngadustako ajaran Allah rik Rasulna. - Lazhaa
Joda da naraka say tikhususko untuk jolma-jolma say goring ningkuk-tingkuk ko horto, pasiyut, kikit, rik risok ngahimatko jolma saro, mak haga busadokah, mak haga buzakat, rik pudak nyambinyut asak uwat jolma kilu sumbangan. - Huthamah
Joda da naraka say tikhususko untuk jolma-jolma say risok ningkuk-tingkuk ko horto say burupa Emas, Pirak atawa Parunggu, say mak haga buzakat horto, ngahimatko jolma saro. Di naraka hasa horto-horto say ditingkukko tiyan bakal jadi siksaan. - Sa'ir
Joda da naraka say tikhususko untuk jolma-jolma say Kafir, rik jolma say risok nganik horto sanak Yatim. - Wail
Joda da naraka say tikhususko untuk jolma-jolma say risok ngurangi timbangan, curang dilom budagang, untuk andapokko kauntungan say bulipat, nonti barang dagangan tiyanna tisuwah rik tikurukko dilom tanihik tiyan sabagay azab untuk dusa-dusa tiyan say kok radu tigawiko samaso hurik di duniya.
Rujukan
[dandani | dandani sumbor]- ↑ Phyllis Ghim-Lian Chew (29 November 2012), A Sociolinguistic History of Early Identities in Singapore: From Colonialism to Nationalism, Palgrave Macmillan, p. 195, ISBN 9781137012333
- ↑ Dallapiccola AL (2002), "Naraka", Dictionary of Hindu lore and legend, New York: Thames & Hudson